Алматыдағы Мемлекеттік академиялық корей театрының 94 маусымындағы жаңа премьерасы!
Интернет сайт адресі: https://koreantheatre.kz/kk/
29 қараша күні Мемлекеттік академиялық корей театрында “Инь-Янь: тұңғиық шегі” аталатын қойылымды тамашаладым. Бұл тек қана пластикаға құрылған, би тілімен көрерменді таң қалдырар өнер ұсынған ерекше рухани демалыс сәті деп сеніммен айта аламын. Махаббат пен үйлесім және шексіз кешірім жайлы шығарма байырғы аңыздың желісін бимен баяндайды. Өзге тілдегі театрлардың репертуарын қарап көрсеңіз, корей театрының мемлекеттік тілге құрметіне риза боласыз, репертуарында қазақ жазушыларының шығармасы ең көп осы театр!
Корей театрының маңызы, оның бірегейлігі, құндылықтары, корей мәдениетінің өрнегі ретіндегі рөлі туралы театрдың тарихы мен тағдырына үңілген сайын, біздің театрға деген көзқарасымыз өзімізге деген көзқарасымызды көрсететінін түсінесіз.
1932 жылы Қиыр Шығыста театрдың құрылуы – корейлердің өз мәдениеті мен руханиятын сақтауға деген үлкен ниетін көрсетеді. Ең қиын кезеңдер – депортация, Ұлы Отан соғысы, қайта құру жылдары, Қазақстан тәуелсіздігінің қалыптасу дәуірі – осының бәрінде театр халықпен бірге болды.
Мемлекеттік академиялық корей театры – Қазақстан мәдениетінің ажырамас бөлігі. Ол көрерменді жаңа формалармен, мазмұнды қойылымдармен үнемі таңғалдырып келеді.
Көп адам Қазақстанда корей театры бар екенін естігенде таңғалады. Кейде бұл таңданыс тым әсіреленгендей көрінеді, бірақ оның артында шындық бар: тіпті Кореяның өзінде көптеген адамдар Қазақстанда 90 жылдан астам тарихы бар корей театрының бар екенін біледі және қызығушылық танытады. Бұл театрдың мәні мен рөлі туралы ойлануға себеп.
Шын мәнінде театр – мәдени-тарихи құбылыс. Әлемде Корей түбегінен тыс жерде мемлекеттік корей театры бар басқа ел жоқ. Тіпті Кореяның өзінде академиялық мәртебеге ие корей театры жоқ, ал бізде бар. Бұл – депортацияның ауыр тарихынан туындаған, бірақ сақталып, дамып келе жатқан феномен.
Республикалық мемлекеттік академиялық корей театры — белгілі бір тарихи үдерістің нәтижесінде қалыптасқан этномәдени құбылыс. Театр 1932 жылдың қыркүйек айында құрылған. Мемлекеттік қолдаудың арқасында Қазақстанда корей түбегінен тыс орналасқан жалғыз мемлекеттік театр жұмыс істейді. Ол 90 жылдан астам тарихы бар және бүгінде ұлттық корей театрының ең ұзақ тарихына ие бірегей мәдени мекеме болып табылады.
Бұл — бесінші буын корей әртістері еңбек етіп жүрген ерекше шығармашылық ұжым.
Театрда ұлттық өнердің негізгі жанрларын таныстыратын кәсіби ұжымдар шоғырланған: «Самульнори» фольклорлық ансамблі, дәстүрлі корей би балеті, вокалист-солистер және театрдың өзегі — драмалық труппа.
Театрдың шығармашылық ауқымы кең: драмалық қойылымдардан бастап дәстүрлі халықтық театрланған мерекелерге дейін (мысалы, «Чусок», «Сольналь»), концерттер мен заманауи эстрадалық шоулар қамтылады.
Театрдың 90 жылдан астам тарихында 5,5 миллионнан астам көрермен тамашалап, 300-ден аса спектакль мен концерттік бағдарлама сахналанған.
Театр өнерін дамытуға қосқан зор үлесі үшін Корей театры «Құрмет Белгісі» орденімен марапатталған, көптеген құрмет грамоталары мен дипломдарға, соның ішінде халықаралық деңгейдегі марапаттарға ие.
Бес әртіске «Халық әртісі» атағы, он бесіне — «Өнердің еңбек сіңірген қайраткері», төртеуіне — «Қазақстан Республикасының еңбек сіңірген қайраткері», он жетісіне — «Еңбек сіңірген әртіс» атағы берілген. Жеті әртіс «Достық», «Парасат» және «Құрмет» ордендерінің иегерлері атанған.
Театр әрқашан корей халқының өмірінде ерекше орын алып келеді. Оның тағдырында корейлердің тарихы су тамшысындай айқын көрініс тапқан.
Өз қызметінде театр корей өнерін сақтау мен дамыту орталығы болып, жалпықазақстандық мәдениеттің ажырамас бөлігіне айналды.
Тарихи тұрғыдан театр корей диаспорасының бірегейлігін сақтау, рухани шыдамдылығын бекіту және қоғаммен мәдени диалог орнату миссиясын атқарды. Бүгінде оның академиялық мәртебесі, кәсіби құрамының жоғары деңгейі және репертуарлық әртараптануы театрдың стратегиялық маңызын растайды.
Алматыдағы Мемлекеттік академиялық корей театры – тек өнер орталығы ғана емес, тарихи жадының, мәдени сабақтастықтың және этностық бірегейліктің символы. Оның қызметі Қазақстандағы көпмәдениетті қоғамның тұрақтылығын, мәдени әртүрліліктің құндылығын және өнердің біріктіруші күшін айқын көрсетеді.