“СӨЙЛЕ СУРЕТ” Графикалық суреттер көрмесіне шақырамыз. (20-сурет жарияланды)

14 қазан күні Астана қаласындағы Еуразия ұлттық университетінде танымал суретші Аңсаған Мұстафаның «Сөйле, сурет» атты алғашқы көрмесі өтеді. Қазан айының 25-не дейін жалғасатын шарада әлеуметтік тақырыптардағы қылқалам туындыларын тамашалауға болады.
Аңсаған Құрманғазықызын жіті танымайтындар үшін аз-кем ақпарат айта кетейік. Ол 1979 жылы Атырау облысы Миялы ауылында дүниеге келген. 13 жасынан «Ақ босаға» газетінің көркемдеуші редакторы қызметін атқарып келеді. Республикалық көркем сурет колледжін, Т.Жүргенев атындағы Өнер академиясының графикалық дизайн бөлімін бітірген. Академия қабырғасында А.Дүзелханов, А.Омаров, М.Қыдырбаев сынды ұстаздардан дәріс алды. Оның қолтаңбасы әлеуметтік тақырыптарды көп қалам тартуымен ерекшеленеді. Әрбір туындысы ащы шындыққа құрылған. Суреттері арқылы көпшілік ортаға, жалпы қоғамға ой тастағысы келеді. Тың тақырыптар мен өзекті мәселелердің тамырын тап басып, еріксіз назар аудартады. Қолынан шыққан дүниелерді әрдайым әлеуметтік желілер арқылы насихаттап, көпшілікке жеткізіп отырады. Нәтижесінде, талантты иллюстратордың шығармалары түрік, жапон, грузин, қырғыз, ағылшын, орыс және тағы да басқа он шақты тілдерге аударылып, шетелдік сайттарда жарияланып үлгерді.

Кей суреттері фейсбуктің Латын Америка сегментінде жергілікті ең танымал артистердің рейтингісінен асып түскен. Бүгінде Еуроодақта, Жапонияда тарайтын журналдар қайта басуға рұқсат сұрап отыр. Оларға қазақстандық басылым «Ақ босаға» газетіне сілтеме жасап, қайта басу құқығы тегін берілген.

– Соңғы жылдары әлеуметтік желіні тұтынушылар арасында суреттерім біраз танымалдылыққа ие болды. Олар төл туындыларымды өз көзімен көргілері келетіндіктерін жиі айтады. Сол кісілердің сұрауымен жеке көрмемді өткізуді ұйғардым. Басты мақсатым – қазақ жастарына, жалпы, көпшілікке ой тастау. Тәлім-тәрбие жұмыстарын заманауи және әркімге бірден түсінікті инфографика тәсілін пайдалана отырып жеткізу. Шараны өткізуге қолдау білдіріп, атсалысқаны үшін Лев Гумилев атындағы Еуразия ұлттық университетінің ректоры Ерлан Сыдықовқа және университет ұжымына алғыс білдіремін, – дейді Аңсаған Мұстафа.

Автордың мәліметінше, «Сөйле, сурет» көрмесі екі апта ішінде Елордадағы білім ордаларының барлық студенттеріне таныстырылады. Сондай-ақ алдағы уақытта еліміздің басқа да қалаларына апару жоспарда бар.

Ақпарат иесі: Байдәулет Қаншайым. http://aikyn.kz/articles/view/59109