Ж дыбысы мен әрпі
Атырау облысы, Құрманғазы ауданы, Ганюшкин селосы.
Абай атындағы қазақ орта мектебі. Бастауыш сынып мұғалімі
Каримова Айгүл Аманбайқызы
Тақырыбы: Ж дыбысы мен әрпі
Мақсаты : 1. Ж дыбысы мен әрпін таныту, ол арқылы берілген сөздерді оқу мен жазуға үйрету. 2. Оқушының логикалық ой-өрісін, өз ойларын еркін жеткізе білу дағдыларын дамыту. 3. Ынтымақтаса жұмыс жасай білуге, жақсыны үйреніп, жаман әдеттерден аулақ болуға тәрбиелеу.
Сабақтың түрі : Тренинг сабақ
Сабақтың типі : Жаңа білімді меңгерту.
Жүрісі: І Ұйымдастыру.
– Балалар, біздің бүгінгі Әліппе сабағымыз тренинг түрінде өтеді. 3 топ болып берілген тапсырмаларды орындайсыңдар. Әр дұрыс жауаптарыңа 5 ұпайдан беріліп отырады. Бұл сабағымыздың ережесі бар, сол ережелерді есімізге ұстап орындауымыз қажет.
Ережелер :
1.Тыныштық сақтаймыз.
2. Сұрақтарды талқылауда белсенділік көрсетеміз.
3. Бір-бірімізді тыңдаймыз.
4. Өз тәжірибелерімізді ортаға саламыз.
5. Жауап толық болмаған жағдайда топ мүшелері толықтыру.
Әр топтың топ басшысы сайланады.
Сабағымызды « Ынтымақсыз іс бітпес » деген ұранмен бастай отырып, сіздерді ұйымшылдыққа, ынтымақтаса жұмыстануға шақырамын.
ІІ Өткен сабаққа шолу.
– Өткен сабақта біз қандай дыбыс, қандай әріппен таныс болдық?
– Ы дыбысы қандай дыбыс?
– Бағандағы сөздер мен « Қақпашы » мәтінін оқыту.
( Әр топтың ұпайын мұғалім бағалау тақтасына іледі )
ІІІ. Жаңа сабақ.
1. « Ой шақыру»
– Балалар, қазір жылдың қай мезгілі?
– Қазір мен сіздерге жұмбақ жасырамын.
Жазда тұрып жоғары,
Күзде жерге қонады. ( Жапырақ )
– Жапырақ сөзі қай дыбыстан басталады?
Қазір біз Ж дыбысы мен әрпімен таныс боламыз.
– Ж дыбысын дыбыстату.
– Ж дыбысына қатысты суреттермен таныстыру.
2. Ж дыбысымен таныстыру.
Ж дыбысы сөздің көбіне басы мен ортасында кездеседі, ал қазақ тілінің байырғы лаж, мұқтаж сөздерінде сөз соңында кездеседі. Ж дыбысы-дауыссыз дыбыс.
3. « Сөз ойла, көп ойла ! » ойыны
Ж дыбысы кездесетін сөздер айту, сөздегі ж дыбысының орнын анықтату, сөздерді буынға бөлу.
( Әр топтың ұпайын мұғалім бағалау тақтасына іледі )
4. « Жаңа буындар қонақта »
Жаңа буындармен таныстыру, оларды хормен айту.
ЖА ЖО ЖУ
5. « Тез, әрі сауатты оқиық! »
Жаңа буындардан құралған сөздерді оқып, әр сөзге түсінік беру.
жаға- сырт киім мен көйлек-көншектің жағасы немесе өзен, көлдің жиегі.
жаса- бір нәрсені дайындап, істеп шығару.
жота- биік жер, төбе немесе малдың арқасы, жоны.
жантақ- түйе сүйсініп жейтін тікенекті өсімдік.
жалау- матадан қиып тігілген арнайы ту секілді белгі.
жусан- көпжылдық шөптесін өсімдік. Қой мен ешкінің жақсы азығы.
– Балаларға хормен оқыту.
6. « Кім тез? » ойыны.
( Берілген сөздерге әр оқушы қолдарындағы түсті дөңгелекшемен дыбыстық талдау жасайды ) Жуа жылан жапырақ жолбарыс
( Әр топтың ұпайын мұғалім бағалау тақтасына іледі )
7. Ойын « Байланыстыр »
Сол жақ бөлігіндегі ж дыбысынан басталып тұрған суреттерді оң жақ бөлігіндегі сәйкес келетін суреттермен байланыстыру.
8. Оқулықпен жұмыс
– Мұғалім « Жусан »мәтінін оқып, түсіндіреді.
– Мәтінді оқушыларға тізбектей оқыту.
( Әр топтың ұпайын мұғалім бағалау тақтасына іледі )
9. Көркем жазу.
– Ж әрпінің баспа және жазба түрлерімен таныстыру.
– Ж әрпінің элементтерін жазып көрсету.
– Ж әрпін ауада жазу.
– Ж әрпін дәптерге көркем жазу.
10. Сергіту сәті.
11. « Ұйқасын тап! » ойыны.
– Іші тоған шәрбат, -Сырты қандай қатты,
Дәмі қандай әйбат, Дәні сондай тәтті,
Үзесің бірден жүзін, Шағып қара таңдап,
Оның аты- …( жүзім ) Оның аты- …( жаңғақ )
-Құйрығы он қарыс,
Бұл- айбатты …(жолбарыс )
( Әр топтың ұпайын мұғалім бағалау тақтасына іледі )
12. « Жақсы болу – өз қолыңда »
Суреттердегі жақсы және жаман әдеттер жайында оқушылар пікірі.
ЖАМАННАН ЖИРЕН ЖАҚСЫДАН ҮЙРЕН
ІV. Қорытындылау, мадақтау.
– Сабақ соңында жоғары ұпай жинап, сабаққа өте жақсы қатысқан топқа
« Қазақстанның туын көкке желбіретер азамат,азаматшасы болыңдар !» деп көк жалаушаны үлестірдім.
– Сабаққа жақсы қатысқан топқа « жіптің ұзындығындай өмірлерің ұзақ болсын ! » деп ақ жіптер үлестірдім.
– Келесі топқа «Қызыл жұлдыздай жарқырап жүре беріңіздер !» деп қызыл жұлдызшалар үлестірдім.