Қалыпты жұмыс қарқыны бойынша 45minut.kz басылым редакциясында жұмыс жүргізілуде еді. Әдеттегі жұмыс дегеніміз, ұстаздардан күніне келген 300-400 дей хатты жеке-жеке оқып шығу, сонымен қатар оларды сайтқа жариялануға, газетке жариялануға, сұрақтар, өтініштер, шағымдар, тілшілерден келген хаттар, сертификат хаттары т. б тақырыптар бойынша тиісті папкаларға сұрыптау, редактор, бағдарламашы, менеджер қызметкерлердің жұмыс пошталарына жіберу жұмыстарының атқарылуы. Осы жұмыстарды күнделікті атқару бір адамның қызметі болғанымен ерекше ыждағаттылық пен мұқияттылықты талап етеді. Себебі, басылым қызметінің сапалы болуы осы жерден басталады.
Оқырмандарымыз үшін редакция қызметкерлерінің бір күндік қызмет жағдайындағы нақты шешілген мәселе бойынша жұмыстың атқарылуы туралы баяндап, Республикалық редакция жұмысын үйлестіру тек қана редакция қызметкерлерінің емес, негізінен Республикалық басылымға жанашырлық білдіріп, бірлесе жұмыс атқарып отырған Ұстаздар тарапынан жасалынатынын білдіргім келеді. Себебі, Республикалық басылым Ұстаздарға қызмет көрсетеді және тиісті жанашырлық сапалы қызметке әкеледі. Сонымен, оқиға барысы бойынша:
Күнделікті жұмыс почтамды қараған уақытымда "Редакторға" деп келген хаттар ішінен Қызылорда облысы, Қазалы ауданы, Қазалы ауылы,
№100 орта мектебінің I санатты бастауыш сынып мұғалімі Саулебаева Ләззат Шәкиқызынан келген өтініш хатты оқыдым. Хат мазмұнында: Газеттің Республикалық басылым қосымшасы. 14 қараша 2012 ж | № 002 санында жарияланған "Киіктің айласы" тақырыбындағы сабақтың өзге ұстаздың атынан жарияланып кеткені туралы жазылған екен. Сонымен, "сабақ кімдікі, авторы кім" деп іздеу басталды.
Келген хаттарды оқып сұрыптаушы қызметкерге, газетті жасаған бағдарламашыға, редактор көмекшісіне "Сабақ кімдікі? Авторы кім?" "Жұмыс кезінде қайда қарағансыңдар" деген мәтінде тиісті нұсқаулар жіберілді. Сонымен, "Киіктің айласын" іздей бастадық. Өзім де қателік қайдан кетуі мүмкін екенін ойланып отырмын. Себебі, жарияланымнан бұрын материал редактор қарауынан өтеді.
Өтініш хат иесіне: "Сабақ қазіргі уақытта авторы және келген почтасы бойынша іздестірілуде" деп жауап хат жібердім. Себебі, келген хат, өтініш бойынша жұмыстың басталғаны туралы хат иесіне хабарлау жұмыстың сапалы әрі нақты болуына негіз болады.
Алғашқы жауаптар келе бастады, Хаттарды оқып сұрыптаушы: "Ағай, ондай сабақты таба алмадым", Бағдарламашы: "Маған берілген материалды салдым, ештеңе өзгертпедім", Көмекші: "Бәрі дұрыс болатын, тағы тексеріп жатырмын" деген жауап хаттар келді. Ал, сабақ кімдікі екенін қайдан табамын енді?
Дереу, телефон арқылы байланысып, редактор көмекшісіне: "Сол күнгі сабақ жиналған папканы, архивті іздестіріп, рабочий вариант файлды табу керек, сол файлды маған жіберіңдер" деп тапсырма берілді. Себебі, сол соңғы нұсқада жиналған файл ішінде өзгертілмеген, сабақ қандай болып келсе сол қалпында жинақталып тұрады. Сонымен қатар, "Киіктің айласы" деген сабақты сайт ішінен де іздей бастадым.
"Киіктің айласы" сабағы сайтта бірнеше нұсқасы бар екен, сол нұсқаларды газетте жарияланған нұсқамен салыстырып қарай бастадым. Почтама рабочий вариант файл келгені туралы хат келді, оны да жүктеп алып іздестіріп қарап отырмын. Бір жағынан газеттің электронды нұсқасы да ашық, ол да қаралуда. Міне, енді түсіндім, таптым, қуандым. Шындығында: Сабақ хат иесінікі, авторы газетте қате көрсетілген.
Сабақтың рабочий вариант, газеттегісі, сайттағысын салыстыра отырып, газетке жарияланудағы қателік қай жерде кеткені табылды.
Сабақта автордың мәліметтері хат ішінде және файл атауында жазылған екен, сабақ ішінде жазылмаған екен, ал қателесіп түскен автор осы "Киіктің айласы" сабағынан кейінгі материал үшін екен. Бағдарламашы газетті жасап отырып, сабақ авторын сабақтың үстіңгі орнынан таба алмаған соң, астындағы тұрған автордың мәліметтерін жазған екен. Сондықтан сабақ басқа автор атынан жарияланыпты.
Сабақтың табылғаны туралы және өзгерістер енгізілу үшін тиісті тапсырма берілгені туралы хат авторына хат жіберілді. Әрине, жалпы алғанда осы қателік редакция қызметкерлерінен кетті деп айтуға да болады, немесе сабақ жіберген кезде автор туралы мәліметтерді неге сабақ үстіне жазбаған деп авторға да айтуға болар еді, бірақ мәселе бұл емес. Мәселе, кеткен қателікке кінәліні тауып жазалау емес, кеткен қателікті дұрыстау, алдағы уақытта мұқияттылықпен жұмыс істеуге үндеу. Атқарылып отырған жұмыстардың маңыздылығы мен жауапкершілігін сезіну, адамдық фактор жағынан кететін қателіктерді барынша азайту, бірлесе жұмыс атқару.
Осы жерде редакция қызметіне түсіністік білдіріп, қателікті дер кезінде жөндеуге көмектескен Қызылорда облысы, Қазалы ауданы, Қазалы ауылы, №100орта мектебінің I санатты бастауыш сынып мұғалімі Саулебаева Ләззат Шәкиқызына ерекше алғыс білдіргім келеді. Бірлесе қызмет атқаратын жанашыр оқырмандарымыз бар кезде редакция жұмысы да алға басып жаңа белестерден көріне береді деп сенемін.
Сонымен қатар, жауапкершілігі мол, маңызды жұмыс атқарып отырған редакция қызметкерлерінің барлығына да алғыс білдіремін. Ұстаздарға жасаған қызметтеріңіз жемісті болсын, Ұстаздар адамзатты тәрбиелеуде, Ұстаздарға сапалы қызмет көрсету болса абыройлы жұмыс деп білемін.
Р. S. Бұл жазбадағы жазылған жұмыс оқиғасы, редакция қызметкерлері — бағдарламашы, хаттарды оқып сұрыптаушы, редактор көмекшісі, редактордың атқарған жұмысының бір ғана мезеті. Ал, жазбада жазылмаған редакция қызметкерлері: Тілшілер, Интернет арқылы оқырмандарға жауап беріп отыратын қызметкерлер (Маил ру агент арқылы) және сертификат, топтамамен жұмыс істейтін қызметкер, газет таратушы, сайтқа сабақ салып отыратын бағдарламашының жұмыс мезеттерін алдағы уақытта жазатын боламын.
Әрдайым бізбен бірге болыңыздар, құрметпен: Редактор. Ізгілік Нағиев
