Насириддинова Дилбар Махмудуллаевна

Оңтүстік Қазақстан облысы Сайрам ауданы

№45«1 Май» жалпы орта мектебі

бастауыш сынып мұғалімі Насириддинова Дилбар Махмудуллаевна

Отбасы тәрбиесі – қоғам негізінің бастауы

Отбасы – адам баласының өсіп-өнер алтын ұясы. Адамның өміріндегі ең қуанышты қызық дәурені осы отбасында өтіп жатады. Бала өмірінің алғашқы күнінен бастап ата-ана өздерінің негізгі борыштарын – тәрбие жұмысын атқаруға кіріседі. Бала өсіп өне келе, тәлім-тәрбие алуға мектеп табалдырығын аттайды. Мектеп пен ата-ана арасында тығыз байланыс орнайды.

Биылғы жылдың 25-30-қаңтар аралығында «1 Май» мектебінде «Отбасы тәрбиесі – тұрақты қоғам дамуының факторы» атты ата-аналар апталығы аясында жоспарлы іс-шаралар ұйымдастырылды.

Апта бойына ата-аналарға ашық есік күндері жарияланды. Бұл күндері әр сыныпқа оқушылардың аналары қатысып, балаларының оқу қабілетімен танысып, пән мұғалімдерімен пікір алмасты.

Әрбір отбасындағы басты құндылық – бала тәрбиесі. Сол бала тәрбиесінің ішіндегі ең маңыздысы да, жауаптысы да – қыз бала тәрбиесі. Өйткені бүгінгі қыз – ұлтымыздың ертеңгі болашағы. Қыздар саналы да тәрбиелі болып өссе, терең білім алса, біздің де өрелі міндет биігінен көрінеріміз анық.

29 қаңтар күні «Менің отбасымның бағы – елімнің мәртебесі» атты сынып ата-аналар жиналысы ұйымдастырылып, ата-аналарға «Қыз бала тәрбиесі» және «Мектептегі білімнің берілуі» жөнінде саулнама үлестірілді. Мақсаты – ата-аналардың мектеп біліміне деген көзқарасы өз балаларына деген сенімі және пән мұғалімдерімен байланысының қандай деңгейде екенін байқау. Сауалнамалар 10 сұрақтан тұрды. Барлық сұрақтарға ата-аналар ашық, өз ойларын бүкпесіз көрсетіп, жауап берген. Сауалнама қорытындысында ата-ананың 80%-ы оқушылардың сапалы білім алуы ата-ананың баланың сабағын үнемі қадағалауына байланысты екенін, баласының жақсы оқитынына сенім білдіре алатынын, мұғалім мен оқушылардың қарым-қатынасы жұмсақ, жайлы, достық қатынаста болса деп көрсеткен. Сынып жетекшімен баласы туралы жиі пікір алмасып отыратындықтарын, мектептегі білімге көңілдері толатындығын, сонымен қатар, ата-ана мектеппен тығыз байланыста болу керек екенін айқындап берді.

Ұйымдастырылған апталық оң нәтиже беріп, тақырып аясында оқушылар мен ата-аналар, мұғалімдер өзара тығыз байланыста болып, көкейде мазалаған сұрақтарына жауап алып, сұхбаттасып, пікірлескен болатын.