Жаңалықтар

«Қашықтан оқыту – оқушылар мен ата-аналар үшін жаңа тәжірибе» Онлайн-брифинг

Қашықтан білім беру мәселелесі бірінші кезекте шағын жинақты мектептер үшін тиімді. Мұндай пікірді бүгін «Қашықтан оқыту – оқушылар мен ата-аналар үшін жаңа тәжірибе» тақырыбында өткен онлайн конференция барысында қоғам қайраткері Мұрат Әбенов айтты.

Онлайн жиналыс ҚР Білім және ғылым министрлігінің Фейсбук әлеуметтік желісіндегі ресми парақшасында ҚР Білім және ғылым вице-министрі Шолпан Каринованың, қоғам қайраткері Мұрат Әбеновтің, химия пәнінің мұғалімі Жігер Телеухановтың және ата-аналардың атынан сөйлеген Түркітілдес журналистер қорының президенті Нәзия Жоямергенқызының, танымал тележүргізуші Гүлнәз Әлімгерейдің, блогер Алмас Тоқабаевтың, сондай-ақ, маңғыстаулық үш оқушының анасы Ақбөбек Жолбасарованың қатысуымен өтті.

«Қашықтан оқыту, бұл бірінші кезекте шағын жинақты мектептер үшін тиімді. Ол жерлерде физика, информатика сынды пәндердің мұғалімдері болмайды. Шалғай ауылдардағы балалар үшін аталған пәндер сапалы оқытылмайды. Ал, қашықтан оқыту жүйесі арқылы бүкіл Қазақстанға сабақ беретін мықты азаматтарды табуға мүмкіндік туып отыр. Қазақстан бойынша жақсы ұстаздарды іріктеп алсақ, болашақта солар арқылы теледидарды пайдалана отырып, шалғай елді-мекендердегі және шағын жинақты мектептерде сабақ жүргізу мүмкіндігі бар», – деді Мұрат Әбенов.

Сондай-ақ, онлайн пікір алмасу барысында Мұрат Абдуламитұлы қашықтан оқыту жүйесі білім саласындағы бәсекелестікке қабілеттілікті арттырып, туғызғандығын және нәтижесінде талантты азаматтарды алға шығарып жатқандығын да атап өтті.

ҚР Білім және ғылым вице-министрі Шолпан Каринованың қатысуымен «Қашықтан оқыту – оқушылар мен ата-аналар үшін жаңа тәжірибе» тақырыбында онлайн-брифинг болып өтті. Онлайн форматта өткен жиынға ата-аналар, қоғам белсенділері, мұғалімдер, журналистер мен блогерлер қатысты.

Сөз тізгінін алған Шолпан Таңатқызы қашықтан оқытудың екінші аптасын қорытындылап, жаңа форматта оқыту кезеңінде Білім және ғылым министрлігі үшін ата-аналардың ой-пікірлерін білу маңызды екендігіне тоқталып өтті.

«Екі аптаның қорытындысы көрсетіп отырғандай, мұғалімдер мен оқушылар қашықтан оқытудың бірнеше форматын пайдалануда. Теледидар арқылы ұйымдастырылған сабақтар өз тәртібімен жүріп жатыр, мұғалімдер мен оқушылар арасында кері байланыс орнатылған. Бүгінгі таңда оқушылар, мұғалімдер және білім беру процесінің басқа да қатысушылары «BilimLand», «Daryn.online», «Kundelik» платформаларында асқан белсенділік танытуда. Сондай-ақ, білім беру платформалары түске дейінгі кезеңде көп пайдаланылатындығын көріп отырмыз. Қазірде еліміз бойынша 435 мектеп штатық режимде жұмыс істеп жатыр. Жергілікті атқарушы органдар қажет болған жағдайда оқушыларды компьютермен және интернетпен қамтамасыз етуде. Қашықтан оқыту форматы осы екі аптаның ішінде бір жүйеге келді. Орын алған қандай да бір мәселелер шешіліп, мұғалім мен оқушы арасында кері байланыс орнатылды», – деді Білім және ғылым вице-министрі.

Өз сөзінде Шолпан Каринова жоғары білім беру саласында қашықтан оқыту форматы бұған дейін де пайдаланылғандығын айтып өтті. Қазіргі таңда еліміздегі көптеген жоғары оқу орындары өз білім ордаларында ашықтық қағидасын қалыптастырып, жоо сайттарында студенттерге арналған ашық лекциялар жүктелген екен.

Брифинг барысында вице-министр Шолпан Таңатқызы тікелей эфирге ата-аналарымен бірге қатысып отырған балақайларға да сұрақ қойып, олардың қашықтан оқыту форматына қатысты пікірлерін білді. Сондай-ақ, ата-ана ретінде де ой-пікірін білдіріп, өз балалары үшін қашықтан оқыту процесі қалайша жүріп жатқандығымен бөлісті. «Балаларымның қашықтан оқыту процесіне қатысуын сырттай қарап, бақылаймын. Осылайша, білім беру саясатының білім беру ордаларында қаншалықты жүзеге асырылып жатқандығына да назар аударып отрамын. Мұғалім оқушы үшін ең жақын адам, жанашыр адам. Бір байқағаным, қашықтан оқыту барысында балаларымыздың жауапкершілігі одан әрі арта түскендей. Олар өз уақыттарын реттеп, дұрыс ұйымдастырып жатқандығының куәгері болып жүрміз», – деді Ш.Каринова.

Сөз соңында Білім және ғылым вице-министрі Шолпан Таңатқызы брифингке қатысқан ата-аналарға алғысын білдіріп, ата-аналар тарапынан айтылған құнды пікірлер үнемі назарда екендігін айтып жеткізді. «Білім беру саласы үшін қашықтан оқыту — дамудың жаңа кезеңі болып отыр. Жаңартылған білім беру мазмұны балалардың өмірдегі функционалдық сауаттылығын жетілдіруді көздейді. Өз кезегінде, критериалды бағалау жүйесі баланың күнделікті сабаққа дайындалуы мен жалпы білім алуы баға үшін емес, өзі үшін қажет екендігін бұрын-соңды айтқан болатынбыз. Ендігі кезекте, қашықтан оқыту барысында аз уақыттың ішінде соның дәлелін көріп отырмыз. Сондықтан іске асырылып жатқан жаңартылған білім беру мазмұны дер кезінде енгізіліп, қазақстандық білім жүйесін функционалдық биік деңгейге шығаратынына сенім мол», – деді Шолпан Каринова.

Қазіргі пандемия жағдайына қарамастан, бала білімнен қол үзбеу керек. Осындай пікірді бүгін «Қашықтан оқыту — оқушылар мен ата-аналар үшін жаңа тәжірибе» тақырыбында ҚР Білім және ғылым вице-министрі Шолпан Каринованың қатысуымен өткен онлайн-брифинг барысында Түркітілдес журналистер қорының президенті Нәзия Жоямергенқызы айтты.

«Қашықтан оқыту — оқушылар мен ата-аналар үшін жаңа тәжірибе» атты веб-конференция форматында өткен жиналысқа ата-ана ретінде Түркітілдес журналистер қорының президенті Нәзия Жоямергенқызы, ақтаулық үш оқушының анасы Ақбөбек Жолбасарова қатысты. Сондай-ақ, қоғам қайраткері Мұрат Әбенов, химия пәнінің мұғалімі Жігер Телеуханов, танымал  тележүргізуші Гүлнәз Әлімгерей және блогер Алмас Тоқабаев қашықтан оқытуға қатысты өз пікірлерімен бөлісті.

«ЮНЕСКО мәліметі бойынша, қазір әлемде 1 млрд 400 млн-ға жуық бала мектепке бара алмай отыр. Бірақ бала білімнен қол үзбеуі керек. Карантин басталған кезде балаларды оқыту форматына қатысты Үкімет тарапынан қабылданған шешімдермен келісемін. Балалар мерзімінен ерте демалысқа жіберілді. Білім және ғылым министрлігі ақылы сайттарды тегін қылып, жаңа мүмкіндіктер берді», – дей келе, Нәзия Жоямергенқызы пандемия жағдайында қашықтан оқыту форматын қолдайтындығын айтып жеткізді.

Білім және ғылым вице-министрі Шолпан Таңатқызы ата-ананың бұл пікірімен толықтай келісіп, білім саласы бойынша мемлекеттік комиссияға ұсынылған барлық шешімдердің жылдам қабылданғандығы туралы айтып жеткізді.

Добавить комментарий

Этот сайт использует Akismet для борьбы со спамом. Узнайте, как обрабатываются ваши данные комментариев.