Жыл сайын 100-ден астам мемлекетте 1994 жылдан бері қалыптасқан Дүниежүзілік мұғалімдер күні атап өтіледі. Бұл барлық мұғалімдердің, оқытушылар мен жалпы білім беру саласы қызметкерлерінің кәсіби мерекесі. Барша ұстаздарды редакция атынан кәсіби мерекелеріңізбен шын жүректен құттықтаймыз!
Халқымыздың ұлы батыры Бауыржан Момышұлы «Ұстаздық — ұлық емес, ұлы қызмет. Себебі, ұрпақтарды ұстаз тәрбиелейді. Болашақтың басшысын да, данасын да, ғалымын да, еңбекқор егіншісін де, кеншісін де ұстаз өсіреді… Өмірге ұрпақ берген аналарды қандай ардақтасақ, сол ұрпақты тәрбиелейтін ұстаздарды да сондай ардақтауға міндеттіміз” деген.
Ұстаз – ұлағатты есім. Шәкірттерін білім нәрімен сусындатып, тәлім-тәрбие беру, жақсы қасиеттерді бойына дарытып, адамгершілік рухта бағыт-бағдар беруде ұстаздың еңбегі зор. Сондықтан да ол әрдайым қасиетті тұлға ретінде ерекшеленеді.
Ұстаздық қызметіне шынайы берілген, жаңалықты жатсынбай қабылдайтын, шәкіртінің жанына нұр құйып, өмірде өзі де бақытты болып, өзгелерді де бақытқа жеткізсем деп жүретін ұстаздардың жөні де, жолы да бөлек.
Зайтуна Туралиевна ұстаздық кәсібімен қатар Республикалық «BILIMNUR» баспасының жауапты тілшісі, «Қазақстанның үздік ұстазы», «Шығармашыл, тәжірибелі ұстаз», «Қазақстан педагогтерінің 100 жаңа есімі», «Қазақстанның құрметті азаматы» төсбелгілерінің иегері.
Кәсіби білім саласында «Бастауыш сыныптарға арналған диктанттар жинағы», «А. Құнанбаев — 175 жыл. Абай әлеміне саяхат» авторлық жинақтардың авторы. Республикалық, облыстық, қалалық деңгейде іс-тәжірибесі тұрақты жарияланып, қоғамдық жұмыстарға белсене араласып жүрген ұлағатты ұстаз.
