Жаңа сабақтар

Ардақты ана, Батыр ана, Ер ана

Маңғыстау облысы Мұнайлы ауданы Атамекен селолық округі
№7 жалпы білім беру орта мектебінің биология пәні мұғалімі
Алиева Гүлзада Амандыққызы

Мақсаты: Аналардың өмірін, еңбек жолдарындағы кездескен қиындықтарды тыңдата отырып, оқушыларды еңбексүгіштікке, ұйымшылдыққа тәрбиелеу. Ауыл тарихын тереңірек білуге көмектесу.

Көрнекілігі: Сынып ішін мерекеге сай безендіру. Қазақтың батыр қыздары мен аналарының портрттері, ана туралы даналық сөздер:

Анаңды меккеге үш арқалап апарсаңда,

Қарызыңнан құтыла алмайсың.

Ердің анасы – елдің анасы.

Ана сүтін ақтамағанды ешкім мақтамайды.

Анасын сүгеннің баласын сүй.

Ата – асқар тау,

Ана – бауырындағы бұлақ,

Бала — жағасындағы құрақ.

Барысы:

Мұғалім: Құрметті қонақтар, ұстаздар және оқушылар! Бүгін біздің сыныпта ашық тәрбие сағаты, яғни ер аналармен кездесу сағаты. Сондықтан бүгін бізге қонақта – батыр ана, ер ана, еңбеккер ана, зейнеткер ана.

Тәрбие сағатымызға қош келдіңіздер! Осы сағат барысында сұрақтарға жауап беріп, әңгіме айта отырып, оқушыларға еңбек жолдарыңыздан қиын да қызықты кездерін әңгімелей отырсаңыздар.

Ән «Туған жер» — орындайтын Абатова Айгерім

1-оқушы: Бастадым сөзімді «Ана» деп мен,

Себебі анам ғой мені адам еткен.

Өмірдің бар асылын бойына жиып,

Дүниенің ардақтысы анам екен.

2-оқушы: Туғаннан құлыным деп аймалаған,

Өзіңнен қымбат адам қайда маған.

Дүние аналармен көрікті ғой,

Онсыз бір бұлбұл да сайрамаған.

Әңгіме: «Анамның қолдары»

Мұғалім аналар мейрамы қарсаңында үйге ананың қолы хақында бір шығарма жазуға тапсырма береді. Ананың еңбекқорлығы жөнінде бірнеше сөздер жазыңдар дейді. Екі күннен кейін мұғалім үй тапсырмасын сыныпқа оқытқан еді.

Бабалар сөзінен өсиет:

Әсет би: Ассалаумағалейкум, Абыз баба,

Жасыңыз келіп қапты жүз жиырмаға.

Атамыз айтып еді дейтұғын ұрпақтары,

Айтыңызшы өсиет бір асқан дана.

Абыз баба: Е, ұрпаққа жеткізетін Әсет би өзің болсаң, мен айтатын, сен тыңда.

Ата-ананың қадірін,

Балалы болғанда білерсің.

Ағайынның қадірін,

Жаманы болғанда білерсің.

Балалықтың қадірін,

Саналы болғанда білерсің,

Асыл менен пасықты,

Бағалы болғанда білерсің.

Бостандықтың қадірін,

Жабылғанда білерсің.

Қалтаңдағы ақшаңды,

Қағылғанда білерсің.

Денсаулықтың қадірін,

Ауырғанда білерсің.

Ақ бетіңнін қадірін,

Қан кеткенде білерсің.

Ақ білектің қадірін,

Әл кеткенде білерсің.

Жиырма бестің қадірін,

Жас кеткенде білерсің.

Қара көздің қадірін,

Нұр кеткенде білерсің.

Татулықтың қадірін,

Дос кеткенде білерсің.

Жақсы әйелдің қадірін,

Өлгенінде білерсің.

Жақсы туыс қадірін,

Көмгенінде білерсің.

Аяқ-қолдың қадірін,

Ақсағанда білерсің.

Отыз тістің қадірін,

Қақсағанда білерсің.

Қызыл тілдің қадірін,

Тоқтағанда білерсің.

Білгеніңді сөйлеп қал,

Білгендерден ғибрат ал, — деген екен.

Адамның тоғыз жауы:

Басты жауың – жалқаулық

сорлататын жаныңды,

Осалдығың – аңқаулығың

соқтыратын саныңды.

Жасқаншақ болсаң, ұры алар,

қорадағы малыңды

Жалатқызбас жасықтығың

ауызыңдағы балыңды.

Өтірік айтсаң өңмеңдеп, жоғалтасың арыңды,

Өсек терсең телмеңдеп, суға кетірер салыңды.

Көпірме босқа мақтан ғып,түкке тұрмас барыңды.

Көрінгенге жалтақтап, бола алмайсың жағымды.

Біреуді арбап, алдаумен аша алмайсың бағыңды.

Ән «Анашым» — орындайтын Акбаева Нұрсәуле.

Бата:

Сәулелі сөз сөне ме,

Орны бөлек батаның.

Бізге тәлім өнеге,

Ақ тілеуі ананың.

Әр сөзінің ақырын,

Жақсылыққа тірейді.

Қадап айтып ақылын,

Көпке бақыт тілейді.

Аналардың ең үлкені балаларға тілек айтып, ақ батасын береді.

Қорытынды

Мұғалім: Аналар, қалқып бақыт аралында,

Лайым мұң қонбасын жанарыңа.

Осымен кешімізді аяқтайық,

Гүл бітсін бәріңіздің қадамыңа, — дей отырып, бүгінгі тәрбие сағатымызды аяқтайық.

Реклама

Добавить комментарий